http://www.groups.yahoo.com/group/MAOIST_REVOLUTION:
Chadli Molintas Command
NPA-Ilocos-Cordille ra Region
Aramid ti pakakitaan
Marso 10, 2010
Dagiti nakakatkatawa a patta-patta ti Armed Forces of the Philippines itay laeng nabiit a nangisilpo iti maysa a kandidato a para presidente ken nasurok 50 politiko iti New People's Army ket pakakitaan ti nakaay-ay-ay a kinakuneng ti makinarya a pangpropaganda ken psywar ti rehimen nga Arroyo. Kas pammaneknek, nangidatag ti AFP ti intelligence report a nakailistaan dagiti nagan ti politiko a sumupsuporta ti NPA, ken kinuna na a ti desisyon a mangsuporta iti maysa a kandidato ti kina-presidente kasukat ti kuarta ket inaramid ti Communist Party of the Philippines kabayatan iti taripnong iti anibersaryo na idiay barangay Aguid, Sagada, Mountain Province idi Disyembre 28, 2009. Madlaw a sadino la ditan ti nangpidpidutan ti AFP ti datos a nailanad iti intelligence report gapu ta uray dagiti bukod na nga opisyal ket mariro. Ti anibersaryo ti CPP ket Disyembre 26, ken awan ti taripnong a napasamak tapno madesisyonan no siasino ti maiyindorsar a para presidente idiay barangay Aguid wenno sadino man a paset ti Kordilyera.
Iti sumagmamanon a lawas a napalabas, adda report ti AFP a dimmanon iti midya a mangibagbaga a nakakolekta ti NPA ti P56.71 milyon idi eleksyon ti 2004 ken P27.67 milyon idi eleksyon ti 2007. Idi Marso 8, inreport ti midya a napan iti COMELEC da Maj.Gen.Ruperto Pabustan, komander ti 9 Infantry th Division ken dadduma pay a nangangato nga opisyal ti AFP tapno dawaten da ti diskwalipikasyon dagiti kandidato nga atapen da nga agit-ited ti pinansya ken materyal a suporta iti NPA iti porma iti permit-to-campaign wenno permit-to-win fees. Sinuportaran met a dagus ni Commissioner Rene Sarmiento ti AFP babaen iti panangdakamat na iti palso a report a ti NPA ket nakakolektar iti P1.5 bilyon idi eleksyon ti 2004 ken P2 bilyon idi eleksyon ti 2007, ken mabalin a makakolektar iti P5 bilyon iti umay nga eleksyon. Ti report ti AFP a nagbayad dagiti politiko ti pinullo a milyon a pesos iti NPA ket palso ken saan a nakapapati. Ti lawlawaten ni Sarmiento a binilbilyon ti nakolektar ti NPA ket panagamangaw na laeng ken ad-adda a saan a kapapati.
Ibilbilang ti NPA dagiti eleksyon iti uneg iti reaksyonaryo nga estado kas panagiinnagaw iti poder dagiti nadumaduma a bunggoy dagiti agturturay a dasig. Saan a makipaspaset ken saan na a maikeddeng ti resulta dagitoy nga eleksyon. Iti sabali a bangir, itantandudo ti NPA a ti pudno a demokratiko nga eleksyon a mangisarsarming ti pagayatan ti umili ket maar-aramid kadagiti lokal nga organo ti bileg iti politika a naibangon kadagiti rebolusyonaryo a base kadagiti kaaw-awayan.
Ti COMELEC ti agar-aramid kadagiti balligi iti eleksyon, uray kadagiti kandidato a saan a pinili dagiti umili. Inaramid na daytoy idi iproklamar na ni Gloria Arroyo kas presidente idi 2004. Itultuloy na nga ar-aramiden daytoy idi iproklamar na itay laeng nabiit da Lilia Pineda, Benjamin Dy, ken Roberto Pagdanganan a nang-abak kadagiti agdama a nakatugaw a mabigbig a kritiko ni Gloria Arroyo. No kayat ti AFP ken ti COMELEC nga idiskwalipika dagiti kandidato nga ibagbaga da a nagbayad iti NPA para iti permits-to-campaign, irugi da iti anak ti presidente a ni Dato Arroyo nga ibagbaga dagiti militar a nagbayad iti agingga P7 milyon. Kabayatan nga ar-aramiden da daytoy, iraman da ti economic adviser ti presidente ken gobernador ti Albay a ni Joey Salceda a dakdakamaten ti militar a nangitunda iti bayad ni Arroyo. Da Dato Arroyo ken Gov. Salceda ket adda da iti lugar a sakup ti responsibilidad ti 9th Infantry Division. Kitaen tayo no maaramid ni Maj. Gen. Pabustan ti salsalawasawen na.
Aramid ti pakakitaan!
Martin Montana
Tagapagsarita
No comments:
Post a Comment